Pantun Aceh, deungoe nasehat

Mulia tuboh yang tem seumbahyang
Ta pujoe tuhan azza wa jalla
Mulia ulee seumikee panyang
Ta tem peutimang rugoe ngon laba
Mulia punyueng deungoe nasehat
Ubak Hazarat doa ta pinta
Mulia mata kalon yang jroh-jroh
Yang han peu reuloh iman lam dada
Mulia babah yang baca quruan
Yang com tika seumayang hidong mulia
Mulia nariet tutoe peu timang
Mulia lisan nariet ta jaga
Mulia baho beugoet peu timang
Lam kekuasaan han semena-mena
Laku beu ade hana brat siblah
Hana meuubah yang lagee kada
Mulia jaroe kayem sedeukah
Le that faedah keu kawom lingka
Hana ji ceumeucue jaroe meutuwah
Han ji beurangkah rang kari hawa
Mulia hatee pat ji duek taat
Kon niet buet bangsat hinan ji teuka
Hatee yang taat tingat keu Allah
Senang ngon susah sabee lam saba
Mulia pruet di dalam tuboh
Hana broh putoh keunan ji teuka
Haleu ngon hareum kalheuh meu sareng
Hana meu sandeng hinan ban dua
Mulia gaki beu jroh ta langkah
Bak jalan Allah keunan ji teuka
Kon bak maksiet ngon bak buet salah
Hana faedah yang le cit desya
Meunan keuh ilee rakan meu tuah
Haba lon syarah nyan bhah agama
Kadang rakan na salah peugah
Lon lakee meuah desya di hamba
Saweub ulon nyoe ilmee goh leupah
Mantong le salah nariet di hamba
Saleng peu ingat umi ngon ayah
Tuboh meutuah sama ta jaga