Tatron u laot takalon bintang
Tatron mugoe blang taluem kutika
Pileh umara ta timang timang
Pileh pimpinan ta kira kira
Tapugot rumoh ta rancang rancang
Tapugot rangkang ta ura ura
Pileh ureung jroh areh budiman
Pileh seu iman ureung yg taqwa
Kaye di gunong meuganong meudang
Unoe meutampang tualang raya
Carong ileume lua ngon dalam
Yg dhiet pikiran akhirat donya
Ranup lam bate meukarang karang
Ranup lampuan peujame teuka
Beusep dum syarat adat ngon reusam
Qanun aturan jitupat punca
Peuraho layue u pulo pinang
Umbang geulumbang ngon bakat raya
Oh jeut umara bugot peutimang
Oh jeut pimpinan beu bi jaksana
Punca phon kreung ni di samarkilang
Gunong that manyang di nanggro lingga
Oh jeut umara beugaseh sayang
Oh jeut pimpinan bulueng jeup sama
Tasumpai punyueng bak gob khun lancang
Tajaga kalam nariet bicara
Meujroh ta atoe rakyat dum seunang
Gata jisayang wahe e raja
Hukom di nanggro dlm alqur an
Tacok peudoman hadis mustafa
Taklok ban kitab qanun aturan
Marwah meuriwang iskandar muda
Komentar