Teungku di pasee pakek tangkulok
Teungku leubee sok kupiah turki
Hareuto euntu meutumpok tumpok
Kuasa tampok meudelat neugri
*
Sikin on tubee ulee jih bungkok
Sikin lhee kurok ujong meulili
Marwah keunubah si peudueng on jok
Darat dgn lhok seuruta pasi
*
Dalam that dalam aye di teulok
Kapai jimasok kedah dan deli
Sungket meulayu kaen si pucok
Meunungui datok sultan syah dauli
*
Harta riatsyah rincong meupucok
Ule meutandok keubue galuen pi
Tatueng ata droe bak got beu tasok
Taboh yg brok brok beujroh di qalbi
*
Asai ie nira awai nibak jok
Tungkoi geu antok di tgk syekhi
Janji amanah bek asai tarok
Qinayah that lhok di tgk sufi
*
Beuruden aceh meuboh meusok sok
Tacok saboh yok keu manek jari
Pesan amanah bek asai anggok
Meu ie ta tugok bek turhok diri
*
Kaye peurulak meubak seumantok
Kapai teungku trok sampoe patani
Beukeuh sapue peh beusaban antok
Jaroe tamulhok meu ah ta meu bri
*
Jayeh rangkayan kaja tan meusok
Alon tan masok suara bansi
Kon salah beunung meucuet cuet padok
Salah urueng jok dgn ureung bi
*
Tgk dlm gle geupike u lhok
Tgk di teulok pike keu pasi
Musara pakat beudhit meurumbok
Boh me ngon boh jok saleh beumeuri
*
kawe aneuk iet kajikap bujok
Saboh seunusok ikan gurami
Malam ka sudah jiteuka ngantok
Lale lon dawok di dlm mimpi
*
Panton lam cae asai ku rabok
Kadang ka masok bahasa deli
Bila pun salah maaf hai datok
Minom situgok begitu tamsi.
Komentar