Aneuk leuk kutru ji grop grop kuchang
Aneuk siwah blang jipo po gisa
Meunyo ta pileh yg gaseh sayang
Alang bak jampang ji ingat jasa
*
Aneuk tuloe tot jipo meulayang
Cot uroe timang angen peu do da
Peuraho layeu beucarong pawang
Peuraho tongkang lisek peutua
*
Timu utara ureung meutunang
Barat peh canang seulatan hila
Meu ato beujroh tgk keujruen blang
Hai ulee balang peutupat banja
*
Meu lasa bungong tungkoi lam karang
Meubak that reumbang si bungong jeumpa
Ku tubuet bacut kujok keu abang
Kutubuet sikhan kujok keu cuda
*
Sinyak jak koh trieng pugot keu layang
Meutaroh manyang wate lheuh asa
Meuso yg talo meuso yg meunang
Bek peukreuh ceukang peulapang dada
*
Alahai do do sinyak do kuchang
Kutimang timang lam ayon ija
Alahai do do sinyak meu en prang
Galak meu ayang ngon rakan muda
*
Sinyak Meu en pet di dalam padang
Ji peusom badan dalam beuluka
Musom dlm lhok kabulut pinggang
Musom lam rawang kabulut dada
*
Ta jak meuramien u pasi lapang
Takalon lancang hai tumpuen sira
Meubu lam bungkoh ngon eungkot panggang
Kuwah lam rantang tabi beu sama
*
Alahai syik syik meulabo adang
Hai syik tot arang si kaye bangka
Talo ka jiklik meukhik yg meunang
Meusapue padan teutap adoe a
Komentar