Oh alang pade lake bu lubeh
Oh alang bijeh neulhong tamita
Jampang so tulong muka that rumeh
Jampang teuseuheh mameh suara
*
Tajak ek u gle mita gue maneh
Ta tiek si cumeh lam kuwah lada
Reusam lam gampong adat di aceh
Beusare tameh beujikap bara
*
Bak gara reulueng bungka di bineh
Abeh jijak weh seumirah raya
Bak gara urueng pikiran ku 'eh
Abeh dum tupeh talo adoe a
*
Bak gara gara ka irang tameh
Abeh meudaleh kasalah bara
Bak gara gara peutimang timseh
Abeh dum beungeh gadoh syedara
*
Sayang si lihin dengong si saleh
Sayang si maneh dengon nyak hawa
Sayang that dilon dum ureung aceh
Ka meukleh meukleh peuthun keunira
*
Rincong lam sarong ujong ka cumeh
Peudueng bak bineh rhap puntong mata
Wali ngon karong bungeh meubungeh
Jadeh bak jadeh ka masam muka
*
Gajah yg meulho sidom suwah weh
Rimueng meudaleh kajilet rusa
Puthun politek karu dum timseh
Daleh meudaleh sabe si bansa
*
Di apa risyen suwah peh peh meh
Di apa saleh ka peh peh meja
Di apa gani geukhem teu heh heh
Gadoh peh peh eh di apa baka
*
Di cupo puan tupong golom ceh
Jeungki ka geupeh ale binasa
Apam cupo jah itam rhot bineh
Apam cupo deh itam ngon gasa
*
Meunan sigutu hai tgk aceh
Haba keu timseh etno meumada
Meunyo na salah harap bek bungeh
Beurumeh rumeh meu ah lon pinta
Komentar