Ta pugot jantan takoh peulawi
Pugot keu jati seunulek jeumpa
Bacut lon ceukot di dalam rawi
Bacut lon pansie keu bhah pilkada
*
Tanggai limong blah bak februari
Saheh ka meuri posko jibuka
Pemilu aceh jadeh bak dali
Suara tabri tatueng umara
*
Nibak lumboi sa,na pak tarmizi
Ka deungon waki pak maksal mina
Ureung meu laot kawom peutani
Geupugah janji geunuk peu jaya
*
Teuma keudua ureung ta turi
Carong ngon ahli apa karia
Asai bak troe preut tan dawa dawi
Meunan lam tivi debat baroesa
*
Teuma yg keu lhe abdullah idi
Kalheuh teu uji yoh saboh masa
Ureung ceurudek bak diplomasi
Ureung yg ahli bina usaha
*
Teuma yg keupuet jeut dokto zaini
Ka neutuban kri bak thon baroesa
Jalan geubangun ngon transportasi
Nasar keu waki hayeu lumpahna
*
Teuma keulimong meukunong that hi
Mualem rasi bak prang geurila
Mantong meunumat bak taloe wali
Mou helsinki saleum panglima
*
Teuma yg keunam tgk irwandi
Geupuduek waki ngon bapak nova
Harapan asa sepakat hati
Motto ka geubi saluem j k a
*
Tumbok on putek melhap teurasi
Teumon ie kupi meukunong bada
Nama ka meuso urueng ka meuri
Ule ngon gaki dalam pilkada
*
Spanduk meulhat lengkap ngon visi
Tujuan misi iklan lam gamba
Haba meutuleh meubagoe janji
Aleh na bukti oh jeut umara
*
Neupuphom keudro meuso neu rasi
Dukungan neubri pilehan gata
Calon peminpin yg bukti janji
Bek tukang taki neuboh keu raja
*
Ingat firman kalam ilahi
Yg ubah janji munafeq nama
ingat bak nariet bak hadist nabi
Yg galak taki bukon umatnya
Komentar