Gara gara asee

Peu keutak keutok di cong bak lawah
Jeh aneuk siwah di kap seurungga
Han ku tujuet jak di lon rumoh kah
Asee that juwah jeumudroh raya
*
Ku dong bak pageu geu eu le ayah
Ku dong yub panah geu eu le poma
Pakiban tunu hate lon sosah
Meutan leumah kah hai bungong jumpa
*
Ku preh bineh krueng oh ka seumurah
Teupin rap patah hana lot dua
Kupreh lam supot bak bale dayah
Ka teungku peugah hanjuet duek dua
*
ku preh bak jurong na lutong reungkah
Ku preh lam poh kah jipoe geulawa
Ku preh oh sungue oh hana ayah
Sabe asee kah jiweh weh hana
*
Pakiban cara kujak rumoh kah
Nyan asee juwah mata meusaga
Pakiban cara meurumpok ngon kah
Meutan ji minah nyan asee raya ?
*
Ku ikat areng takot rhoh yah kah
Jadeh meuramah geulet meutaga
Ku rhom ngon lumbeng takot na mak kah
Jadeh sang keumah geurhom ngon nuga
*
Alahai abang meubek keuh sosah
Hate bek gundah gata keucewa
Meunyo ka meuhut neutatap wajah
Neupreh keuh leupah asee lam paya
*
Pantang di asee meukruh kruh lipah
Hana pike grah jilet meubura
Meunyoe di cut bang meuhut jak langkah
Areng neupapah di bineh rimba