PARIDON PARI MEUKAWEN

Alhamdulillah limpah ujeun troen
Tuhan bri keu lon hate peungeuh trang
Jinoe lon kisah putroe paridon
'Oh ban troeh lansong woe pari mambang

Peuduek ngon pakat leugat yoh nyan phon
Rakyat lam gampong neukrah le reujang
Tuha ngon muda hingga ka di troen
Banda ngon duson inong ngon Agam

Turon le sabda bak raja payong
Putroe paridon linto rab datang
Malam seulanyan gob nyan troeh geutroen
Raja nyang agong indra budiman

Jinoe meuhase sare hai kawom
Beucukop mandum lua ngon dalam
Cok pade leukat jeh pat dalam krong
Ta top keuteupong ladom breuh keutan

Ta peugot teumpat beugot lam geudong
Ta tambak jurong ta sek ngon jalan
Peu duek piasan malam gaca phon
Ta pasang tanglong lua ngon dalam

Peurintah keurja Gata nyang hukom
Lon seurah mandum bak ulee balang
Meunan keuh titah di raja payong
Rakyat lam gampong yoh nyan phon mumang

Inong ngon agam keunan meuhimpon
Laju meuroen-roen tamong u dalam
Geubóh ngon gaca cut nyak paridon
Ka geu peuseuón putroe rupawan

Buet ahli maja peureutek ie oen
'Oh lheuh nyan lansong geu koh ngon andam
Malam jumeu'at geu bóh gaca phon
Di dalam geudong peu duek piasan

Lua ngon dalam katrang dum tanglong
Jipeh deungon góng seureuta canang
Jipeh keucapo bunyi meu alon
Maklum hai kawom meung buet piasan

Maseng keuteuja meujeumba hukom
Nyang ladom-ladom rah cawan pingan
Ladom sie leumo nyang teumbon-teumbon
Han peu ta hitong maklum sibarang

Astagfiru'llah lidah meu ek troen
Meu'ah desya lon adoe ngon abang
Jinoe lon peugah putroe paridon
Po bungong sukon cantek rupawan

Tamuek lhee malam gaca ka lansong
Putroe paridon peungui pakayan
Kareuna linto pih rap troeh geutroen
Singoh hai kawom malam seulanyan

Geubóh ngon minyeuk mangat bee harom
Barang gasoe com jeut ek keu mumang
Peungui meuligoe sampoe u anjong
Tabeng geu gantung meumacam-macam

Ngon peurmadani pih ka geu susoen
Tika kasap mbon pih la geubeuntang
Ikat ngon tiree cahya meu ayon
Miseu lam keubon syuruga lapan

Buèt aneuk dara nyangka-ka meuphom
Jitu'oh mandum bak peugot reusam
Meuribee bangon bungong ji susoen
Rata jeut ujong meureuntang reuntang

Alah adex cut han jeut lon sambong
Bahle lon puntong dilee keu bhah nyan
Di yup pih lagak sigak hai kawom
Nyan pih that muphom buet ureung agam

Kalheuh geuhiyah deungon balerong
Di dalam jurong ato meuriyam
Di bineh jalan geupasang tanglong
Kalheuh geususoen pinto geureubang

Han peu lon peugah leupah troeh ujong
Maklom hai kawom preh linto datang
Daleh pih kawen putroe paridon
Rata jeut gampong meuceuhu kon ban

Takoh trieng gajah reubah trieng beutong
Meusawak ujong di cong bak mancang
Teuduek haba nyoe sinoe ta Puntong
Bah le ta sambong indra budiman

Kuala deli pasi lhoksukon
Kuala bubon raya that sawa
Meuah hai adex jantong bungong rom
Buhu bak ujong bacut meutuka

Muwoe karangan budiman tanglong
Yoh nyan hai kawom katroeh kutika
Malam seulanyan janji masa phon
Gobnyan geunak troen bak putroe muda

Geuhoi ngon sahbat leugat geuhimpon
Gangga bayu phon keunan ka teuka
Deungon rakan droe keunan ka di troen
Bak raja payong indra budiman

Hingga neupeugah bagah le lansong
Ta deungo ulon wahe syedara
Meuligoe sakti keunoe ta peutroen
Ta intat ulon bak putroe Muda

Di gangga bayu jaroe di seuoen
Tuanku ampon ka lin seureuta
Meuligoe pih troeh keunan le lansong
Peungeuh ban tanglong di beudoh cahya

Di ateuh bumoe keunan ka di troen
Di raja payong neu ek le sigra
Meusu ngon canang yoh nyan masa phon
Meusu deungon gong lagee ben ula

Meusu ngon geunta meu alon-alon
Leungo lam jantong tango suara
Meuligoe terbang intan ka meuphom
Nibak awai phon kalheuh meurika

Troeh le bak nanggroe putroe paridon
Rakyat lam gampong deungo suara
Suara geundang lam awan lambong
Yoh nyan ka meuphom budiman Indra

Ji teupeu katroeh raja cut tanglong
Yoh nyan mula phon di bri mulia
Jitót meuriyam meu alon-alon
Lheuh nyan di sambing cang ben ula

Jiyup nafiri jipeh deungon gong
Indra ka neutroen laju u donya
Ngon rakan linto meu ato turoen
Jen pari mandum insan meurupa

seunuddon